اللي كيسول على باك حر 2024 المغرب
كتشري ملف الترشيح من أي مكتبة وكتعمر المعلومات ديالك فالصفحة الأولى من بعد كتديه لآخر ثانوية قريتي فيها وكتعمر شهادة الانقطاع (إلى كنتي غتدوز فشي مدينة من غير اللي قريتي فيها خاصك تديه للنيابة اللي كنتي تابع لها باش يصادقو لك على شهادة الانقطاع)
نفس الملف كتديه للمقاطعة اللي تابعة لمحل السكن ديالك وكتدي معاك الحالة المدنية باش يعمرو لك الخانة اللي فيها نسخة موجزة من رسم الولادة
ملي كتسالي كتگاليزي معاك الملف فالمقاطعة
ملي كيتفتح السيت فشهر 11 إن شاء الله كتسجل فيه (تقدر تسجل راسك براسك غي من تليفون راه ساهل) وكتخرج الاستمارة والالتزام وهاذ الالتزام كتسينيه وكتديه حتى هو تگاليزيه فالمقاطعة والاستمارة كدير عليها فوطوكوبي حيث كيطلبو 2 نسخ (الى تسجلتي فشي سيبير ولا مكتبة قوليه يدير لك الجيمايل ديالك ويعطيك الكود حيث غادي تحتاجو باش تدخل تتبع الوضعية ديال الملف ديالك وبزاف د الحاجات) إلى كنتي غدير الإعفاء من الرياضة كتشري مطبوع (شهادة الإعفاء) من المكتبة ولا سيبير وكتعمرو وكتديه لسبيطار الحومة باش يصادق عليه الطبيب ديالهم وضروري سبيطار المخزن حيث الخصوصي ما مقبولش نسخة من البطاقة الوطنية إيگاليزي شهادة السكنى بالنسبة للناس اللي غيدوزو فالمدينة اللي ما ساكنينش فيها وما عندهمش العنوان ديالها فالبطاقة الوطنية، اما اللي عندو نفس العنوان اللي فالبطاقة الوطنية هو اللي ساكن فيه وغيدوز فيه ما غاديش يحتاجها 2 صور شمسية (وحدة غتكون ديجا لصقتيها فالملف ووحدة ديرها مع الوثائق) 4 أظرفة متنبرة فيهم العنوان ديالك اللي غادي يصيفطو لك فيه الاستدعاء هادشي كامل كتجمعو وسط الملف وكتديه للنيابة اللي تابعة للعمالة ديالكم وها نتا ساليتي ومرة مرة كتدخل للسيت باستعمال الكود ديالك باش تشوف الترشيح ديالك واش تقبل ولا مازال
ملاحظات هامة:
اللي ما مكملش التاسعة لآخر الموسم مغيتقبلش ديالو حيث هاذيك الهضرة ديال واخا تكون قاري غي شهرين ولا ثلاثة لا أساس لها من الصحة واللي قالها لك قوليه وريني فين قريتيها ويجيب لك دليل من موقع رسمي ماشي من المواقع ديال العبار 
حيث لو كانت بصح كاينة غتكتبها الوزارة فالشروط عندها ما تسناش شي موقع براني يجي يكتبها اللي بغا يدفع ويجرب حظو شغلو هذاك غير هو في حالة رفضو له الترشيح ما يجيش يبدا يتشكى ويقولك حگا عطيتوني آمال وضيعتو لي وقتي اللي دفع تاسعة أحرار خاصو ينجح ضروري ويتسنى سنتين عاد يدفع للباك إلى منجحتيش واخا تجلس حتى 30 سنة راه ما مقبولش اللي ناجح فالتاسعة أحرار ودازت سنتين وبغى يتسجل مكيعمرش شهادة الانقطاع فالملف يكفي يدير فوطوكوبي لشهادة التاسعة ويگاليزيها ويديرها وسط الملف أي مترشح عندو الحق فثلاث دورات متتالية سوا نجح فيهم ولا لا من بعد كيتوقف سنتين ويعاود يعطيوه ثلاث دورات جديدة تغيير المسلك بوحدو ما بقاش هاذ العام شروط جديدة من بينها فرض تغيير الشعبة كاملة.. أما بالنسبة اللي منجحش من حقو يعاود نفس المسلك هادشي اللي طاح لي فبالي هاد الساعة وفكرت نكتبو لكم بحكم كنشوف بزااااف د المخربقين غي كيكذبو على عباد الله وكيجاوبو على أي سؤال بالغلط غي باش يتسماو راه عارفين وكيجاوبو - باك ليبر 2024