كشفت وثائق سرية أن الأميرة المغربية اشترت منزلاً فخما بقيمة 11 مليون دولار في لندن الراقية بالقرب من قصر كنسينغتون (Kensington Palace)، و هو مقر العائلة الملكية البريطانية، من خلال شركة صورية وباستخدام أموال من "العائلة الملكية المغربية"، حسب وثائق مسربة تشير إلى مهنتها ب"الأميرة".
وثائق باندورا المغرب
شكون هو ياسر الزناكي اللي طاحت سميتو فتسريبات وثائق باندورا المغرب ؟
ياسر هو من أبناء عائلات الغنية، تزاد فطنجة سنة 1970، يعني راه ماشي باقي صغير، عندو دابا 51 عام، متزوج و عندو ثلاث أبناء.
قرا فليسي ديكارت فالرباط بحال كاع وليدات المرفّحين فالمغريب، شدّ الباك ديالو C و مشا ديريكت لفرانسا باش يقرا ف ESIEA الذكاء الإصطناعي و يتخرج منها مهندس سنة 1993.
شدّ الدبلوم و مشا خدم فواحد البانكا فباريس، من بعد غا يعوّج فحالو لعاصمة الضباب لندن تما فين غا يتلونصا مزياان، خدم مدير مكلف بالتحكيم التجاري فالبنك الألماني فلندن، و هنا غا يدير مجموعة شركات سيينا ديالو ف 1996 اللي غا يشد بيها مارشيات كبار فالمغريب فمجال السياحة.
دار واحد المطعم كبير مغربي فلندن ساعة ما تمشّاش ليه و سدّو.
تعرفات عليه بنة عمة المليك سفيرة المغريب فلندن، و بان ليها درّي عندو ما يقول شاب طموح و قاري مزيان و هوما يعيّطوا ليه يدخل للمغريب بصفة نهائية و يخدم من داخل البلاد.
ف2010 غادي يعيّنوا المليك المغربي وزير للسياحة فحكومة عباس الفاسي، ضرب فهاد المنصب عام، جا الربيع العربي، و جا بنكيران و مشا لو المنصب.
لكن ف 2011 المليك غا يعيّنو مستشار خاص مكلف بالسياحة باش يدير ليه الدراسة ديال مشروع المخطط الأزرق السياحي.
خمس شهور فقط من تعيينو مستشار ملكي وثائق باندورا غا تقول لينا أنه مشا دار شركة أووفشوور فجزيرة السيشل الفرنسية بالباسبور الفرنسي اللي خداه فاش كان كيقرا و يخدم في فرنسا.
هاد الباسبور اللي كيحمل إسم هيغو ياسر الزناكي.
ياسر الزناكي متهم حسب الوثائق المسربة بأنه إستعمل هاد الشركة باش يدير بيها ملايير غير خاضعة للضرائب.